जनकपुर टुडे

२०८३ कार्तिक २६, बिहिवार १७:०२

विराटनगर किंग्ससँग चार विकेटले पराजित भएपछि पोखरा एभेन्जर्स नेपाल प्रिमियर लिग (एनपीएल) को प्लेअफ दौडबाट बाहिरिएको छ।

एनपीएलमा प्लेअफ दौडबाट बाहिरिने पोखरा पहिलो टोली हो। लिग चरणमा एक खेलमा मात्र जित निकालेको पोखरा ५ खेलमा पराजित भएपछि लिग चरणबाटै बाहिरिएको हो।

लिग चरणको अन्तिम खेलमा पोखराले काठमाडौँ गोर्खाजविरुद्ध खेल्न बाँकी छ। पोखराले यो खेलमा जित निकाले पनि प्लेअफमा पुग्न पर्याप्त हुनेछैन। एनपीएलमा अहिलेसम्म प्लेअफ पुग्न नसकेको पोखरा एक मात्र टोली हो।

बिहीबारको पहिलो खेलमा पोखराले दिएको १३३ रनको लक्ष्य विराटनगरले चार बल अगावै ६ विकेटको क्षतिमा भेट्टायो। तेस्रो जितसँगै विराटनगरको प्लेअफ पुग्ने सम्भावना बलियो बनेको छ।

समान ३ खेलमा जित र हार भोगेको विराटनगरले अंक तालिकामा ६ अंक जोडेको छ। लिग चरणको अन्तिम खेलमा विराटनगरले लुम्बिनी लायन्सविरुद्ध खेल्नेछ।

विराटनगरका लागि बसिर अहमदले ३७ र लोकेश बमले ३३ रनको योगदान दिए। सेहान जयासूर्या १७ र इसुरु उडाना २५ रनमा अविजित रहे।

पोखराका लागि रमेश मेन्डिस र कुशल भुर्तेलले समान दुई विकेट लिए। विपिन खत्री र धनन्जय लक्षणले समान एक विकेट लिए।

त्यसअघि कीर्तिपुरस्थित त्रिवि अन्तराष्ट्रिय क्रिकेट मैदानमा टस जितेर ब्याटिङ गरेको पोखरा १७.५ ओभरमा १३२ रनमा अलआउट भयो।

पोखरालाई कम स्कोरमा रोक्न सन्दीप लामिछानेले ह्याट्रिकसहित ६ विकेट लिए। आफ्नो टी–२० करियरको उत्कृष्ट बलिङ गरेका सन्दीपले जारी एनपीएलमा पहिलो ह्याट्रिक गरेका हुन्।

सन्दीपले १५औँ ओभरमा ह्याट्रिक विकेट लिएका थिए। १५औँ ओभरको तेस्रो बलमा युवराज शर्मा, चौथो बलमा चमिका करुणारत्ने र पाचौँ बलमा किरण ठगुन्नालाई पेभेलियनको बाटो देखाउँदै सन्दीपले ह्याट्रिक विकेट लिएका थिए। उनले आफ्नो स्पेलमा २७ रन खर्चेर ६ विकेट आफ्नो नाममा गरे।

त्यसअघि ११औँ ओभरको दोस्रो बलमा सन्नी विके र चौथो बलमा रमेश मेन्डिसलाई आउट गरेका थिए। सातौँ ओभरको दोस्रो बलमा अर्जुन घर्तीलाई आउट गराएका थिए।

सन्दीपले यसअघि कर्णाली याक्ससँग एक विकेट मात्र लिएका थिए। एगेंलो म्याथुस, रुपेश सिंह र चरिथ असंलकाले समान एक विकेट आफ्नो नाममा गरे।