२०७७ बैशाख २२, सोमबार १५:५७
बाँके । निजी वायुसेवा कम्पनीले उडान रोकेपछि हुम्ला जान जहाजको टिकट लिएका यात्रुहरु नेपालगञ्जमै अलपत्र परेका छन् । अध्ययन, व्यापार र अन्य कामको सिलसिलमा जिल्ला बाहिर रहेकै समयमा कोभिड–१९ को जोखिम हुन नदिन लकडाउन जारी भएपछि अलपत्र परेका सो जिल्लाका नागरिक नेपालगञ्ज विमानस्थलमा अलपत्र परेका हुन् ।
यहाँ कोरोनाको जोखिम बढेपछि निजी वायुसेवा कम्पनीले एकाएक उडान स्थगित गरेको बताइएको छ । यसअघि पछिल्ला दुई दिनमा यहाँबाट झण्डै ३०० यात्रुलाई हवाईमार्ग हुँदै सो जिल्ला ओसारिएको थियो । यहाँ रहेका ४९५ जनामध्ये अब अझै १९५ जना यही अलपत्र परेको अनुमान छ ।
ती मध्ये सोमबारका लागि टिकट लिएका ७० जनाभन्दा बढी यात्रु विमानस्थलमा अलपत्र परेका छन् । टिकट काटिसकेका उनीहरुले विमानस्थल पुग्दा उडान नहुने जानकारी पाएपछि आफूहरु घर जान पाउनुपर्ने माग गर्दै विमानस्थल अगाडिको मुख्य सडकमै धर्ना दिनुपरेको जनाएका छन् ।
यात्रु वर्ष भण्डारीले विमानस्थलतर्फ जाँदा आजदेखि उडान नहुने जानकारी पाएपछि विमानस्थलको मुख्य प्रवेश मार्गमै धर्नामा बस्नुपरेको बताएका छन् । यहाँबाट सो स्थानमा उडान भर्दै आएका जहाजका चालकले उडान भर्न नमान्दा सो स्थान जाने यात्रु यही रोकिएका हुन् ।
समिट एयरले लकडाउन अवधिभर उडान स्थगित गरेको जनाएको छ । सो जिल्लावासीको मागलाई मध्यनजर गर्दै सो जिल्लाका नागरिक ओसार्ने काम शनिबारबाट शुरु भएको हो । सीता एयरका तीनवटा, तारा र समिट एयरका एक÷एकवटा जहाजमार्फत यहाँ फसेका सो जिल्लाका नाम्खा, सिमकोट र खार्पुनाथ गाउँपालिकाका नागरिकको उद्धार शुरु भएको थियो ।
यीमध्ये विद्यार्थी, अपाङ्ता भएका व्यक्ति, साठी वर्षमाथिका नागरिकलाई प्राथमिकता दिएर ओसार्न शुरु भएको थियो । कोरोना भाइरसको जोखिम बढेपछि एकाएक उडान स्थगित गरिएको जनाइएको छ । जिल्ला बाहिर फसेका नागरिकलाई हवाईमार्गबाट उद्धारका लागि सो जिल्लाका जनप्रतिनिधिको आग्रहअनुसार पर्यटन मन्त्रालयले सडक सञ्जाल नजोडिएका हिमाली जिल्लाका नागरिकलाई उद्धार गर्ने निर्णय गरेको थियो ।
