२०८३ असार ५, शुक्रबार १७:४९
नेपाली कम्युनिस्ट पार्टी (नेकपा) का संयोजक पुष्पकमल दाहाल प्रचण्डले प्रतिक्रियावादीलाई फाइदा पुग्ने गरी निराशाको खेती नगर्न पार्टीका केहि नेताहरुलाई सुझाव दिनुभएको छ ।
शुक्रबार पार्टी कार्यालय पेरिसडाँडामा डिजिटल माध्यमबाट पार्टी सदस्यता नवीकरण तथा वितरण अभियानको शुभारम्भ गर्दै संयोजक प्रचण्डले कतिपय मानिसहरू पार्टी, आन्दोलन र नेतृत्वप्रति अनावश्यक कचिङ्गल पैदा गर्ने कोसिसमा रहेको भन्दै प्रतिक्रियावादीलाई फाइदा पुग्ने गरी निराशाको खेती नगर्न पार्टीभित्रका नेताहरुलाई सुझाव दिनुभएको हो ।
प्रतिक्रियावादीहरूले लोकतन्त्र र गणतन्त्रको निम्ति, संघीयता र समावेशिताको निम्ति लडेका स्थापीत पार्टीहरुलाई कमजोर पार्ने षड्यन्त्र अहिले पनि अगाडि बढाइराखेको उहाले बताउनुभयो । प्रचण्डले जानेर वा नजानेर पार्टीभित्रकै केहि नेताहरुले निराशा बाढ्ने काम गरेको आरोप लगाउनुभयो । त्यस्तै उहाले सरकारको नीति तथा कार्यक्रम, बजेट र कार्यशैली सबै गरिब, मजदुर, किसानका विरुद्ध छ भन्ने कुरा प्रष्ट देखिएको बताउनुभयो ।
सरकारको श्रमिक वर्ग विरोधी, गरिब मजदुर किसान विरोधी र जनताका मौलिक अधिकार, ट्रेड युनियन अधिकार लगायतका अधिकार विरोधी क्रियाकलापका विरुद्ध सबै मोर्चाबाट आवाज उठाउने उहाले बताउनुभयो । सदस्यता नवीकरणको सुरुवातसंगै यसले पार्टीलाई अझै व्यवस्थित बनाउन योगदान गर्ने विश्वास लिएको समेत प्रचण्डले बताउनुभयो ।
त्यस्तै नेकपाका सह–संयोजक माधव कुमार नेपालले जनतालाई केन्द्रबिन्दुमा राखेर सामाजिक, आर्थिक रुपान्तरणको एजेण्डासहित पार्टी अघि बढ्ने धारणा राख्नुभयो । पार्टीका नेता तथा कार्यकर्तालाई आवश्यकता अनुसार प्रशिक्षण दिएर पार्टीको नीति स्पष्ट रुपमा जनतामाझ लान सक्ने गरि तयारी गरिने उहाको भनाइ छ ।
नेकपाले आगामी दुई महिना डिजिटल माध्यमबाट पार्टी सदस्यता नवीकरण तथा वितरणलाई अभियानकै रुपमा अघि बढाउने जनाएको छ ।
