२०८३ भाद्र २१, आईतवार ०७:३५
नेपाली कुस्ती खेलाडी त्रिलोकीप्रसाद यादवले किर्गिस्तानमा आयोजित छैटौँ विश्व नोमाड गेम्स–२०२६ मा पाँचौँ स्थान हासिल गरेका छन् ।
कुस्ती पहलवानीतर्फ प्रतिस्पर्धा गरेका यादवले इन्डोनेसिया र अफगानिस्तानका खेलाडीलाई पराजित गर्दै सेमिफाइनलको यात्रा तय गरेका थिए । सेमिफाइनलमा आयोजक काजकिस्तानका खेलाडीसँग पराजित भएपछि उनी प्रतियोगितामा पाँचौँ स्थानमा सीमित भएका हुन् ।
यादवले पुरुषतर्फ १०० केजीभन्दा माथिको तौल समूहमा नेपालका तर्फबाट प्रतिस्पर्धा गरेका थिए । प्रतियोगितामा ८५ देशका खेलाडी सहभागी रहेको र कुस्ती विधामा मात्रै ६५ देशका खेलाडीको सहभागिता रहेको यादवले जनाएका छन् ।
अगस्ट ३१ देखि सेप्टेम्बर ६ तारिखसम्म आयोजना गरिएको विश्वस्तरीय कुस्ती तथा बेल्ट रेस्लिङ प्रतियोगितामा नेपाली टोलीले सहभागिता जनाएको हो । यादवसँगै नेपाली टोलीलाई प्रशिक्षकका रूपमा मुम्ताज अली इद्रिसीले साथ दिएका थिए ।
विश्वस्तरीय प्रतियोगितामा नेपाली खेलाडीले प्रभावशाली प्रदर्शन गर्दै पाँचौँ स्थान हासिल गर्नु नेपाली कुस्तीका लागि महत्वपूर्ण उपलब्धिका रूपमा हेरिएको छ । अन्तर्राष्ट्रियस्तरका खेलाडीसँग प्रत्यक्ष प्रतिस्पर्धा गर्ने अवसरले नेपाली खेलाडीको अनुभव र क्षमता अभिवृद्धिमा सहयोग पुग्ने अपेक्षा गरिएको छ ।
यसअघि राष्ट्रिय खेलकुद परिषद्का सदस्य–सचिव रामचरित्र मेहताले प्रतियोगितामा सहभागी हुन जाने नेपाली टोलीलाई एक कार्यक्रमबीच बिदाइ गरेका थिए । बिदाइ कार्यक्रममा नेपाल कुस्ती संघका अध्यक्ष प्रकाशकुमार कुसारी, महासचिव खगेन्द्रबहादुर बस्नेतलगायत खेल पदाधिकारीको उपस्थिति थियो ।
बिदाइका क्रममा खेल पदाधिकारीहरूले अन्तर्राष्ट्रिय प्रतियोगितामा नेपालको प्रतिनिधित्व गर्न लागेका यादवलाई सफलताको शुभकामना दिएका थिए ।
सीमित स्रोतसाधनका बीच नेपाली कुस्ती खेलाडीले अन्तर्राष्ट्रिय प्रतियोगितामा निरन्तर सहभागिता जनाउँदै आएका छन् । विश्वस्तरीय प्रतियोगिताबाट प्राप्त अनुभवले आगामी अन्तर्राष्ट्रिय प्रतियोगितामा अझ उत्कृष्ट प्रदर्शन गर्न खेलाडीलाई सहयोग पुग्ने विश्वास गरिएको छ ।
