जनकपुर टुडे

२०८३ आश्विन ५, सोमबार १८:५३

आगामी असोज ९ गते शुक्रबारदेखि ११ गते आइतबारसम्म देशभर भारीदेखि अति भारी वर्षा र उच्च हिमाली क्षेत्रमा भारी हिमपात हुने सम्भावना रहेको भन्दै मौसम पूर्वानुमान महाशाखाले विशेष सतर्कता अपनाउन आग्रह गरेको छ।

कृषि, वन तथा पर्यावरण मन्त्रालयअन्तर्गतको नेपाल मौसम विज्ञान विभाग, मौसम पूर्वानुमान महाशाखाले सोमबार अपराह्न ‘विशेष मौसमी बुलेटिन-३’ जारी गर्दै बङ्गालको खाडीमा विकसित शक्तिशाली मौसमी प्रणालीका कारण तीन दिन देशभर विपद्को जोखिम उच्च रहने जनाएको हो।

महाशाखाका अनुसार उत्तर अन्डमान सागर आसपास बनेको न्यून चापीय प्रणाली हाल बङ्गालको खाडीको मध्य भू-भागमा रहेको छ।

उक्त प्रणाली थप शक्तिशाली बनेर डिप डिप्रेसनका रूपमा परिणत भई पश्चिम-उत्तरपश्चिम दिशातर्फ सर्दैछ। यसको प्रभावले बुधबारदेखि नै कोशी, मधेश, बागमती र गण्डकी प्रदेशमा वर्षा सुरु हुनेछ।