२०८३ आश्विन २०, मंगलवार १६:०६
नेकपा एमालेले नेपालको भूराजनीतिक अवस्था संवेदनशील बन्दै गएको भन्दै राष्ट्रिय हित र स्वाधीनताको संरक्षणका लागि जागरुकता अपरिहार्य रहेको जनाएको छ।
ललितपुरको च्यासलमा बसेको केन्द्रीय कमिटी बैठकका निर्णय समेटेर एमालेले जारी गरेको ‘अन्तरपार्टी निर्देशन–३’ (अपानि–३) मा विश्वराजनीतिमा तीव्र परिवर्तन भइरहेको र त्यसको प्रत्यक्ष प्रभाव नेपालमा पर्न सक्ने उल्लेख गरेको छ।
शक्तिराष्ट्रहरूमा बढ्दै गएको उग्र राष्ट्रवाद, संरक्षणवाद र एकपक्षीयताका कारण संयुक्त राष्ट्रसंघको भूमिका कमजोर बन्दै गएको एमालेले जनाएको छ। अन्तर्राष्ट्रिय सहयोग र पारस्परिक सम्मानका सिद्धान्त क्षय हुँदै गएको तथा शक्तिराष्ट्रबीचको प्रतिस्पर्धा द्वन्द्वका रूपमा प्रकट हुने अवस्था रहेको बताएको छ।
साना तथा कमजोर राष्ट्रको सार्वभौमिकतामाथि आक्रमण, धम्की र हस्तक्षेप बढिरहेको भन्दै एमालेले बदलिँदो शक्ति सन्तुलनप्रति नेपाल थप सचेत हुनुपर्ने जनाएको छ। चीन, भारत र ब्राजिलजस्ता उदीयमान अर्थतन्त्रले पश्चिमी आर्थिक प्रभुत्वको विकल्प निर्माण गर्दै लगेको पनि अपानिमा उल्लेख छ।
एमालेले गत भदौ २३ र २४ गतेको जेनजी आन्दोलनपछि नेपालको आन्तरिक राजनीतिमा बाह्य चासो र भूराजनीतिक चलखेल बढेको दाबीसमेत गरेको छ। जेनजी आन्दोलनका क्रममा राज्यका पूर्वाधार, ऐतिहासिक स्थल र लोकतान्त्रिक संस्थामाथि आक्रमण भएको तथा निर्वाचित सरकार ढालेर संसद् विघटन गरिएको एमालेको भनाइ छ।
