जनकपुर टुडे

२०८३ आश्विन २३, शुक्रबार ०८:४०

नेकपा एमालेले मधेश प्रदेशमा रिक्त रहेको समानुपातिक सांसद पदमा नाजमा खातुनलाई पठाउने निर्णय गरेको छ ।

एमालेको बिहीबार च्यासलमा बसेको स्थायी कमिटी बैठकले खातुनलाई प्रदेशसभा सदस्य बनाउने निर्णय गरेको छ । एमालेका उपमहासचिव लेखराज भट्टले मधेश प्रदेशको समानुपातिकतर्फ रिक्त रहेको सांसद पदमा नाजमा खातुनको नाम पठाउने निर्णय बैठकले गरेको जानकारी दिए । खातुन एमालेको समानुपातिक निर्वाचन प्रणालीतर्फको बन्दसूचीमा रहेकी थिइन् । एमालेले खातुनलाई बन्दसूचीको प्राथमिकताका आधारमा प्रदेशसभा सदस्य बनाउने निर्णय गरेको छ । उनी एमालेको समानुपातिक बन्दसूचीमा ४०औँ नम्बरमा रहेकी थिइन् ।

एमालेको समानुपातिकतर्फबाट सांसद रहेकी जैनब खातुनको निधन भएपछि उक्त पद रिक्त भएको थियो । रिक्त पदमा नयाँ सदस्य पठाउनुपर्ने भएपछि एमालेले आफ्नो बन्दसूचीमा रहेका नाममध्ये नाजमा खातुनलाई चयन गरेको छ । एमाले केन्द्रीय कार्यालयमा बसेको स्थायी कमिटी बैठकले मधेश प्रदेशको समानुपातिक सांसद चयनसँगै पार्टीका समसामयिक राजनीतिक विषयमा समेत छलफल गरेको थियो । बैठकले रिक्त प्रदेशसभा सदस्य पदका लागि नाजमा खातुनको नाम अघि बढाउने निर्णय गरेको उपमहासचिव भट्टले बताए ।

खातुनको चयनसँगै मधेश प्रदेशसभामा एमालेको प्रतिनिधित्वमा पुनः निरन्तरता आउने भएको छ । मधेश प्रदेशको सामाजिक तथा जनसांख्यिक विविधतालाई ध्यानमा राख्दै समानुपातिक प्रणालीमार्फत विभिन्न समुदाय, वर्ग, क्षेत्र र लिंगको प्रतिनिधित्व सुनिश्चित गर्ने संवैधानिक व्यवस्था छ ।