२०७८ जेष्ठ २१, शुक्रबार ०७:४६
नेपाल सरकारले महोत्तरीको बर्दिबासमा निर्माण गर्ने भनिएको मेडिकल कलेज पनि विवादमा तानिएको छ ।
बन क्षेत्र विनास गरी कलेज निर्माण गर्न लागेको भन्दै विरोध सुरु भएको हो । बिहीवार मिथिला वाईल्डलाइफ ट्रष्ट मिथिला विहारी नगरपालिका ३ धनुषाका अध्यक्ष देवनारायण मण्डलले विज्ञप्ति जारी गरी वन क्षेत्र मासेर कलेज निर्माण नगर्न सरकारलाई सुझाव दिएका हुन् । उनले अहिले कलेज निर्माण गर्ने भनिएको ठाउँको विकल्प खोज्न पनि भनेका छन् । बर्दिबासमा कलेज निर्माणका लागि माउन्टेन थाउट्स कन्सलटेन्सि प्रालि महालक्ष्मी १० ललितपुरले तयार पारेको वातावणीय प्रभाव मुल्यांकन प्रतिवेदनमा बर्दिबाससँगै जोडिएका पूर्व र दक्षिण भेगमा वन बाहिर पर्याप्त जग्गा उपलब्ध हुँदा पनि सो क्षेत्रको बारेमा चर्चा समेत नगरिएको विज्ञप्तीमा उल्लेख छ ।
‘माईस्थान सामुदायिक वनको ५७ हेक्टर र गढन्ता बर्दिबास साझेदारी वनको ४४ दशमलव ५९ हेक्टर गरी कुल १०१ दशमलव ५९ हेक्टर वनक्षेत्र ओगट्ने भनी व्याख्या गरिएको र सो वनक्षेत्रको विनासले बर्दिबासदेखि दशजग्गा सम्मको सम्पूर्ण समुदायलाई प्रतिकूल असर पर्छ’, विज्ञप्तिमा भनिएको छ, ‘तर प्रतिवेदन तयारीको चरणमा बर्दिबास नपा ४ र १ का बासिन्दालाई मात्र छलफलमा सहभागी गराउनाले रणनीतिक रुपमा नै वनभित्रै मेडिकल कलेज निर्माण गर्ने सरोकारवालाहरुको कुदृष्टि प्रष्टै देखिन्छ ।’ पूर्व–पश्चिम राजमार्गको उत्तर तर्फको वनक्षेत्र विकास गरेर यस प्रदेशका जैविक विविधता नष्ट पार्ने र प्रदेशका दक्षिणी भेगका बासिन्दालाई नरकिय जीवन जिउत बाध्य पार्ने योजनाको निर्माण प्रक्रिया अगाडी बढाउदा उपलब्ध विकल्पहरुप्रति गम्भीरतापूर्वक छलफल गरेर अगाडी बढ्न सो संस्थाले आग्रह गरेको छ ।
