२०७८ श्रावण २४, आईतवार ०७:३५
लालबन्दी । सर्लाहीको हरिवन नगरपालिका वडा नं. ९ सुकेपोखरीमा रहेको एक पोखरीमा अचानक माछा मर्दा करिब ५ लाखभन्दा बढीको क्षति भएको छ ।
शुक्रबार राती अचानक स्थानिय जय माँ सन्तोषी कृषी महिला समूहले संरक्षण गरी माछा पाल्दै आएको पोखरीमा माछा मरेको थियो । नगरपालिकाको पोखरी ३ वर्षदेखि महिला समूहले संरक्षण गरी माछा पाल्दै आएका थिए। १० कट्ठामा पानी भएको पोखरीमा साना ठूला गरी करिब १० क्वीन्टल भन्दा बढी माछा मरेको समूहले जनाएको छ । पोखरीको माछा मर्दा करिब ५ लाखभन्दा बढीको क्षति भएको समूहकी सचिव पवन रेग्मीले बताएकी छिन् । माछा कसरी मर्यो अहिलेसम्म खुल्न सकेको छैन । प्रहरीले पानी चेकजाँचको लागि लगेको छ । ल्याबबाट रिपोर्ट आएपछि मात्र कारण पत्ता लाग्ने रेग्मीले बताइन्। समूहकी सचिव पवन रेग्मीले भनिन् “जंगल झाड बनेको पोखरी करिब ३ वर्ष पहिले हामीलाई नगरपालिकाले संरक्षण गरी माछा पाल्नु भनेर दिएको थियो । महिलाहरु मिलेर सफा गरी ३ वर्षदेखि हामी माछा पाल्दै आएका थियौं । कहिले केही भएको थिएन। शुक्रबार बेलुकासम्म केही भएको थिएन । शनिबार बिहान आएर हेर्दा अचानक माछा मरेको देखें। पोखरीबाट समूहलाई ठूलो सहयोग पुगेको थियो । वर्षेनी आम्दानी हुन्थ्यो । त्यहाँबाट आएको आम्दानीले सामाजिक कार्यमा लगाउँदै आएको थिएँ ।”
