२०७८ भाद्र ९, बुधबार १४:१७
बारा वन कार्यालयका तत्कालीन तीन अधिकृतविरुद्ध भ्रष्टाचारको आरोपमा अख्तियार दुरुपयोग अनुसन्धान आयोगले आरोपपत्र दायर गरेको छ ।
अख्तियारले विभिन्न प्रजातिका बिरुवा खरिद तथा सदुपयोगमा भ्रष्टाचार गरेको भन्दै जिल्ला वन कार्यालय बाराका तत्कालीन वन अधिकृत भैरवप्रसाद घिमिरे, सहायक वन अधिकृतद्वय विन्देश्वरप्रसाद पटेल र दिनेशप्रसाद जयसवालविरुद्ध विशेष अदालतमा आरोप पत्र दायर गरेको हो । अख्तियारले घिमिरे र पटेल विरुद्ध ४ लाख ९० हजार रुपैयाँ तथा जयसवालविरुद्ध ३ लाख ९० हजार रुपैयाँ बिगो रकम माग दाबीसहित आरोपपत्र दायर गरेको हो । अख्तियारका प्रवक्ता नारायणप्रसाद घिमिरेले जनाए अनुसार आर्थिक वर्ष ०७३/०७४ मा जिल्ला वन कार्यालय बाराका अधिकृतहरूले बाँसको कलमी बिरुवा उत्पादन वा खरिद तथा सदुपयोग, अम्रिसो बिरुवा उत्पादन वा खरिद तथा वितरण, नदी उकास जग्गामा खयर, सिसौ, सिमल आदि प्रजातिका बिउ खरिद गरी छर्ने समेतको कार्य गर्नका लागि लिएको पेश्की रकम हिनामिना गरेको उजुरीका आधारमा अनुसन्धान गरिएको थियो ।
अनुसन्धानको क्रममा महंगो दरमा बिरुवा खरिद गरी रकम हिनामिना तथा हानी नोक्सानी भएको देखिएकोले आरोपित विरुद्ध सजाय र दिगो सहितको माग दाबी लिइ विशेष अदालत काठमाडौंमा आरोपपत्र दायर गरिएको थियो ।
