२०७९ माघ २०, शुक्रबार १३:०५
राष्ट्रिय परीक्षा बोर्डले कक्षा १२ को परीक्षा आवेदन खुला गरेको छ ।
२०८० सालमा सञ्चालन हुने कक्षा १२ को वार्षिक परीक्षाको नियमित, ग्रेडवृद्धि तथा आंशिक परीक्षाको लागि परीक्षार्थीले नियमित शुल्कमा यहि माघ मसान्तसम्म आवेदन दिन सक्नेछन् । परीक्षा आवेदन फाराम विद्यार्थी स्वयंले भरेको हुनुपर्ने बोर्डले जनाएको छ ।
बोर्डले कक्षा ११ को पनि ग्रेडवृद्धि तथा आंशिक परीक्षाका आवेदन खुला गरेको छ । बोर्डको अनुसार रजिष्ट्रेसन नम्बरका शुरुका दुई अंक ७२, ७३ र ७५ भएका परीक्षार्थीहरुको लागि अन्तिम एक पटकका लागि मात्रै आवेदन दिन सक्ने अवसर हो ।
माघ मसान्तभित्र आवेदन छुटेकाहरुलाई दोब्बर दस्तुरमा फागुन १५ सम्म आवेदन दिन पाउने बोर्डले जनाएको छ । कक्षा १२ को नियमित परीक्षार्थीको रुपमा आवेदन फाराम भर्ने विद्यार्थीहरु (रजिष्ट्रेसन नम्बरको शुरुका दुई अंक ७९ भएका) ले २०७९ सालमा विद्यालय मार्फत लिएको कक्षा ११ को सम्पूर्ण विषयमा सैद्धान्तिकतर्फ न्यूनतम डी एवं आन्तरिक मूल्यांकनतर्फ सी ग्रेड प्राप्त गरेको हुनुपर्नेछ ।
परीक्षा आवेदन फारमका साथ विद्यालयबाट प्रदान गरिएको (तोकिएको न्यूनतम ग्रेड प्राप्त गरेको) कक्षा ११ को ग्रेडसीट प्रधानाध्यापकले प्रमाणित गराएको अनिवार्य हुनुपर्ने बोर्डले सूचनामा उल्लेख गरेको छ ।
प्रयोगात्मक परीक्षा मात्र बाँकी भएका आंशिक/ग्रेडवृद्धि (रजिष्ट्रेसन नम्बरका शुरुका दुई अंक ७२, ७३, ७४, ७५, ७६ र ७८ भएका) परीक्षार्थीहरुले समेत नियमितले सरह शुल्क तिरेर आवेदन दिनुपर्नेछ ।
