२०८० आश्विन २, मंगलवार ०९:१०
सरकारले तीन दिनसम्म भव्यताका साथ संविधान दिवस मनाउने घोषणा गरेको बेला सत्तासीन लोकतान्त्रिक समाजवादी पार्टी(लोसपा)ले कालो दिवस मनाउने घोषणा गरेको छ ।
लोसपाका अध्यक्ष महन्थ ठाकुरले जारी गरेको विज्ञप्तिमा असोज ३ गतेलाई कालो दिवसको रुपमा मनाउने उल्लेख गरेका छन् । लोसपाले ‘असोज ३ कालो दिन’को रुपमा मनाउँदै आएको छ ।‘२०७२ साल असोज ३ गते नेपाल सरकारले एकतर्फी रुपमा जारी गरेको संविधानको हामी विरोध गर्दै आएका छौ’ अध्यक्ष ठाकुरले भने, संविधान संशोधन गर्न हाम्रो माग सम्बोधन नभएकाले विरोध प्रदर्शन जारी छ । उनले पार्टीका जिल्ला र विभिन्न निकायहरुलाई विरोध प्रदर्शन गर्न आग्रह गरेका छन् । खुलेर संविधानको विरोध गर्ने लोसपा एकमात्र पार्टी देखिएको छ । संघीय सरकारमा लोसपाका वरिष्ठ नेता शरतसिंह भण्डारी श्रम मन्त्री रहेका छन् ।मधेश प्रदेश सरकारमा पनि लोसपाको सहभागिता छ । सरकारको घोषणालाई विरोध गर्दै लोसपाले संविधानको विरोधमा प्रदर्शन गर्ने निर्णय गरेको छ ।
सत्ता गठबन्धनमा प्रभावकारी भूमिकामा रहेको जनता समाजवादी पार्टी(जसपा)ले भने संविधानको विरोधमा औपचारिक कार्यक्रम गरिरहेको छैन् । संघीय सरकारमा मन्त्री रहेकाहरु संविधान दिवसको औपचारिक कार्यक्रममा सहभागिता जनाउने गरेका छन् । तर मधेश प्रदेशका मुख्यमन्त्री र जसपाका मन्त्रीहरु भने संविधान दिवसको दिन कुनै कार्यक्रममा सहभागी हुने गरेका छैनन् । मधेश प्रदेश सरकारको मुख्यालय रहेको मधेश भवन परिसरमा कर्मचारीहरुले संविधान दिवसमा औपचारिकता निर्वाह गर्ने कार्यक्रम गरे पनि त्यसमा सरकारको सहभागिता रहने गरेको छैन् ।
मधेश प्रदेशका ८ जिल्लामा सरकारी स्तरबाट पनि संविधान दिवसको अवसरमा प्रभावकारी कार्यक्रम देखिदैन् । प्रदेश सरकार नै संविधान दिवसप्रति उदासीन रहेकाले सरकारी स्तरबाट उत्साहपूर्ण ढंगले कार्यक्रम मनाइँदैन् । मधेशमा संविधानको विरोध भइरहेकै बेला राजावादीको ट् याग भिरेको राप्रपा नेपालले पनि असोज ३ गतेदेखि नै देश व्यापी विरोध प्रदर्शन गर्ने घोषणा गरेको छ ।
