पाँच घण्टे स्वास्थ्य शिबिरमा २ सय ३० जनाद्धारा स्वास्थ्य लाभ

रन्जन यादव
जीतपुर, साउन ५ गते : जीतपुरसिमरा उपमहानगरपालिका वडा नं.५ बकुलियामा शनिबार भएको पाँच घण्टे निशुल्क स्वास्थ्य शिबिरमा २ सय ३० जनाले स्वास्थ्य चेकजाँच गराएका छन् । श्री नेपाल राट्रिय नमुना माध्यमिक बिद्यालयको प्राङगनमा भएको शिबिरमा १ सय ४० जना महिला ,६५ जना पुरुष र २५ जना बालबालिकाहरुले स्वास्थ्य चेकजाँच गराई लाभ लिएका हेल्प युवा क्लबका अध्यक्ष फैजुल हक अंसारीले जानकारी दिए ।

हेल्प युवा क्लब जीतपुरको आयोजनामा भएको स्वास्थ्य शिबिरमा नारायणी बायोधा अस्पतालको बिशेषज्ञ डाक्टरहरुको टोलीले बिरामीहरुको स्वास्थ्य परिक्षण गरेका थिए । डाक्टरहरुको टोलीमा बालरोग बिशेषज्ञ डा.श्रद्धा पन्त ,जेनरल फिजिसियन डा.नबिन प्रसाद गुप्ता ,डाईटिसियन डा.शिखर दहाल ,फिजियो थेरापी डा.सृजना खड्का ,जेनरल फिजिसियन डा.सचिन कुमार यादव र डा.गौरब पौडेलले बिरामीहरुको स्वास्थ्य चेक जाँच गरेका थिए ।

स्वास्थ्य चेकजाँच गराउने अधिकाँस ग्रामिण क्षेत्रका महिलाहरु रहेका छन् । क्लबका अध्यक्ष अंसारीले थोरै समय तर सेवा ग्राही बढी भएको अनुभव भएको बताए ।उनले चाडै नै यही महिनामा जीतपुरमा पनि स्वास्थ्य शिबिर राख्ने योजना रहेको सुनाए । बिरामीहरुको निशुल्क स्वास्थ्य परिक्षण गर्नुको साथै निशुल्क औषधी पनि सह आयोजक बायोधा अस्पतालले प्रदान गरेको हेल्प युवा क्लबका उपाध्यक्ष अयुब खानले जानकारी दिए ।

जीतपुरसिमरा उपमहानगरपालिकाको बकुलिया ,बिसुलिया ,जीतपुर ,अमाडार ,खेस्रौल र फत्तेपुरका बिरामीहरु स्वास्थ्य चेकजाँच गराएका थिए । शिबिरको सहआयोजकमा नारायणी बायोधा अस्पताल ,श्री नेपाल राष्ट्रिय नमुना माध्यमिक बिद्यालय बकुलिया र ईलाका प्रहरी कार्यालय जीतपुर रहेको थियो ।